Балқаш көлі су жағасында демалатындар мен балықшылар және ескекті, желкенді қайықпен шұғылданатындар арасында өте танымал көл.

Балқаш көлі (балық – деген түркі сөзінен шыққан)  Алматы облысындағы ең үлкен ағынсыз көл. Ұзындығы – 600 км, батыс бөлігіндегі ең енді тұсы – 70 км, шығыс бөлігі – 45 км, орташа тереңдігі – 5.6 м, ең терең тұсы – 26.5 м, жағалауының ұзындығы – 2300 км.  01.01.2000 жылғы белгі бойынша су айдынының көлемі 18.2 тыс. км², суының көлемі – 94.7 км³. Су жинайтын алабының аумағы 413 тыс.км², 85%-ы Қазақстан аумағында, 15%-ы Қытау аумағында. Сарыесік жарты аралындағы су асты рельефі мен көл қөл қазаншұқырының күрт тарылып, көлді батыс және шығыс бөлікке бөледі.

Батыс бөлігінің суы тұщы, минералдану деңгейі 1.06-дан 1.58 г/л дейін, шығыс бөлігінің суы ащы 3.6-дан 4.8 г/л-ге дейін жетеді. Қапшағай су қоймасы салынғаннан кейін батыс бөлігіндегі судың минералдануы 1.8-2.0 г/л-ге дейін, шығыснда – 5.4-7.8 г/л-ге дейін ұлғайғаны айқалады. Судың химиялық құрамы гидрокарбонатты-хлоридті-сульфатты және магний-натрийлі. Су құрамы, әсіресе көлдің шығыс бөлігінің емдік қасиеті бар.

Көл негізінен оңтүстік пен шығыстан құятын өзендер есебінен толығады. Оның ішінде ең ірі Іле өзені Батыс Балқашқа құйып, жалпы құйылған судың 80%-ына дейін жетеді. Қаратал, Лепсі өзендері Шығыс Балқашқа құяды. Жер асты суы аса көп рөл атқармайды.

Көл таяз болғандықтан тез жылиды. Жазды күні (шілдеде) су бетінің температурасы 27-28°С, ал ұсақ сулы жағалауларда 30°С-қа дейін жетеді. Қыркүйек айына қарай температура 17°С-қа дейін төмендейді. Қараша айында мұз қата бастайды да, ақпан айында қалыңдығы 60-70 см мұз қатады. Көктем шыққанда ғана, наурыз-сәуір айларында ериді. Негізгі демалыс орындары Балқаш көлінің оңтүстік жағасында, Лепсі стансасының төңірегінде.

Балқаш көлінің жағасында танымал туризм түрлері болып жағажай туризмі, спорттың су түрлері: желкенді қайық, байдаркамен және каноэмен есу, спорттық балық аулау табылады. Балқаш көлінің жағалауында жылына 4 мыңнан астам адам демалады. Демалушыларға жағдайды облыстың ірі өнеркәсіпорындары мен жеке меншік кәсіпкерлердің 9 демалыс зонасы жасайды.